Qëllohen me karrige e shkop bejzbolli, pamjet nga sherri i dhunshëm në Korçë

Një përleshje masive e shoqëruar me dhunë fizike dhe përdorim armësh të ftohta ndodhi mbrëmjen e së dielës në një lokal në lagjen nr. 1 të qytetit të Korçës.

Euronews Albania ka siguruar pamjet e sherrit të dhunshëm, ku shihet sesi konflikti nisi fillimisht me një debat verbal dhe më pas degjeneroi në dhunë fizike, ku u përdorën sende të forta, përfshirë karrige dhe shkopinj bejzbolli, si dhe një mjet prerës.

Si pasojë e përplasjes, dy persona mbetën të plagosur me thikë dhe disa të tjerë të lënduar ndërsa policia ka arrestuar 10 të dyshuar dhe ka shpallur në kërkim një tjetër shtetas 38-vjeçar.

Mes të ndaluarve është edhe një 54-vjeçar, i dyshuar si autor i plagosjes me thikë, ndaj të cilit rëndojnë disa akuza penale, përfshirë tentativë vrasjeje dhe mbajtje të paligjshme të armëve të ftohta.

Nëntë të arrestuarit e tjerë, të moshave nga 21 deri në 51 vjeç, akuzohen për përfshirje në konflikt dhe plagosje me dashje.

Ndërkohë, pronari i lokalit është vënë nën hetim në gjendje të lirë për punësim të paligjshëm, pasi gjatë verifikimeve rezultoi se kishte punonjës të paregjistruar.

LEXONI GJITHASHTU:

• Kush janë 10 të arrestuarit në Korçë për sherrin ku u përdorën thikat
• EMRAT/ Dy të plagosur me thikë pas sherrit masiv në një lokal në Korçë