QSUT binjakëzim me spitalin në Izrael, Koçiu: Riorganizojmë shërbimin onkologjik

Qendra Spitalore Universitare “Nënë Tereza” është binjakëzuar me qendrën spitalore më të madhe izraelite, “Sheba Medical Center”, një partneritet strategjik i cili do të kontribuojë në rritjen e standardeve të shërbimeve shëndetësore për qytetarët shqiptarë.

Marrëveshja e bashkëpunimit është nënshkruar në ambientet e ministrisë nga ministrja Albana Koçiu dhe CEO i “Sheba Medical Hospital”, Yitshak Kreiss.

“Falë marrëveshjes së nënshkruar me “Sheba Medical Center, ekspertë të këtij spitali do të atashohen në Spitalin Onkologjik duke asistuar mjekët tanë në trajtimin e rasteve të vështira, në kohë reale përmes telemjekësisë”, -tha Albana Koçiu, ministre e shëndetësisë dhe mbrojtjes sociale.

Fuqizimi i bashkëpunimeve me qendra të  tilla të ekselencës  për ministren shihet si hallkë kyçe e programit të Autonomisë që ka filluar të zbatohet në 6 qendra spitalore në vend, e që hap pas hapi pritet të zgjerohet më tej në 17 të tilla.

“Pikë tjetër e dakordësuar në këtë marrëveshje është ofrimi i trajnimeve dhe njohja e mjekëve e infermierëve tanë me terapitë dhe pajisjet më inovative. Kjo marrëveshje bashkëpunimi e QSUNT me spitalin prestigjioz “Sheba”, ecën paralel me projektin madhor të Autonomisë Spitalore dhe Praktikave të Dyfishta për mjekët”, tha ministrja.

Bashkëpunimi mes QSUNT-së dhe “Sheba Medical Center” do të ndihmojë në ngritjen e standardeve të kujdesit shëndetësor në Shqipëri si dhe përkrah përpjekjet e MSHMS për të transformuar Qendrën Spitalore Universitare “Nënë Tereza” në një qendër të mirëfillta ekselence.

LEXONI GJITHASHTU:

• Të dhënat e censit për Tiranën: Shumica të martuar dhe femra, 10 mijë të divorcuar
• Irani: Dislokimi i bombarduesve amerikanë, destabilizues për rajonin