Rama: Ka plazhe ku i trajtojnë vizitorët si skllevër, sikur do hanë shkopin e çadrës

Kryeministri, Edi Rama, mbajti këtë të enjte një takim me kryebashkiakët e vendit dhe disa prej ministrave kyç të qeverisjes, ku prezantoi strategjinë e Turizmit për Shqipërinë 2030.

Ai u u ndal tek situata në plazhet e jugut, me theks të veçantë tek Ksamilit.

Ai e cilësoi këtë zonë si një “plazh të dhunuar”, duke vënë në dukje problematika që lidhen me menaxhimin, dendësinë dhe çmimet e vendosura nga operatorët privatë.

“Po e nis me plazhet e dhunuara. Kjo është fjala e duhur për plazhin e Ksamilit, po marr atë se është një ndër plazhet më të bukur të botës dhe nuk mund të jetë më pre e injorantëve që e shikojnë si një tokë për t’u pushtuar dhe pastaj për t’u sjellë me turistët e vizitorët si të ishin skllevër që mund të hanë edhe shkopin e çadrës në kokë,” -u shpreh Rama.

Sipas tij, çmimet e larta për shërbime që nuk justifikohen me cilësinë, si dhe mungesa e hapësirës së lirë në bregdet, po ndikojnë negativisht në përvojën e turistëve dhe imazhin e vendit si destinacion turistik.

“Nuk ka arsye më që plazhi publik i Ksamilit të jetë plazh privat, ku dendësia është e lidhur me stresin, me çmime të cilat vetëm lëndojnë imazhin e turistëve shqiptarë,” – shtoi ai.

Kryeministri theksoi nevojën për rishikimin e mënyrës së shfrytëzimit të vijës bregdetare dhe për ndërhyrje që synojnë rikthimin e një ekuilibri mes interesit publik dhe veprimtarisë private.

LEXONI GJITHASHTU:

• Rama: Vjedhja e ujit duhet të ndëshkohet me burg, si për energjinë elektrike
• Rama prezanton reformën e ujësjellësit: Kishim “58 çeta”, një skemë katastrofë