Rama kritikoi gjyqtarin për vendimin disa ditë më parë, reagon KLGJ

Këshilli i Lartë Gjyqësor ka reaguar këtë të enjte lidhur me deklaratat e bëra disa ditë më parë të Kryeministrit Edi Rama ndaj gjyqtarëve mbi vendimet që janë marrë mbi çështjet e hapësirave publike dhe private.

Përgjigjia vjen disa ditë më pas kur kreu i qeverisë shkroi një status ku kritikoi gjyqtarin Ligoraq Toshi, që sipas tij lidhur me një vendim nuk kishte mbajtur interesin e komunitetit.

KLGJ në deklaratën e saj thotë se reagimet që cënojnë figurën dhe dinjitetin e gjyqtarëve pengojnë pavarësinë e pushtetit gjyqësor.

Nga ana tjetër KLGJ thotë mënyra për të kundërshtuar vendimet është rruga ligjore dhe jo deklaratat publike.

Deklarata e plotë:

Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cënojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor.

Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm.

Këshilli ju bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës. E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse.

KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.

Në një shtet të së drejtës i cili sot është më pranë se kurrë aspiratës për t’u bërë pjesë e Bashkimit Evropian vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut.

LEXONI GJITHASHTU:

• Rama sulmon me emër një tjetër gjyqtar: Nuk është presion, po mbroj interesin publik
• Rama paralajmëron masa për varrezat e makinave: Do ti zhdukim