Ndarja nga jeta e Bashkim Finos, Basha dhe Rama anulojnë takimet elektorale

Kryeministri Edi Rama dhe kreu i Partisë Demokratike Lulzim Basha kanë anuluar takimet elektorale përgjatë ditës së sotme, pas ndarjes nga jeta të deputetit socialist Bashkim Fino.

Mësohet se Basha ka anuluar takimin elektoral që do të zhvillonte në qytetin e Fierit.

Kryeministri Edi Rama ka dhënë edhe një mesazh ngushëllues, ku në një postim në Facebook, kreu i qeverisë shprehet se sot në Partinë Socialiste është ditë zie.

“E pabesueshme, po shumë fatkeqësisht e vërtetë, miku im, miku ynë i mirë Bashkim Fino nuk jeton më! Nuk kam fjalë. Sot për familjen tonë të madhe është një ditë zie, aktivitetet tona elektorale do të ndalen, në nderim e kujtim të vëllait tonë të dashur”, shkruan kryeministri Edi Rama.

Ndërkohë edhe Basha këtë lajm e ka quajtur të trishtë dhe iu ka shprehur ngushëllimet familjes së Bashkim Finos.

Po kështu, qeveria shpalli 29 marsin ditë zie kombëtare.

Bashkim Fino ndërroi jetën në moshën 59-vjeçare. Ai prej disa ditësh ishte prekur nga COVID-19, betejën me të cilin nuk arriti ta fitonte. Ai ishte një nga figurat më të njohura politike.

Kulmi i karrierës së tij do të shënohej në vitin 1997, kur u zgjodh kryeministër i vendit në qeverinë e Pajtimit Kombëtar, post që do ta mbante nga muaji mars deri në korrik.

Lexoni gjithashtu:

Ndahet nga jeta deputeti socialist Bashkim Fino