Rama nga Saranda: Partitë e reja, cikli i dytë i së ndjerës LSI, mos ujisni…

Kryeministri Edi Rama ishte këtë të dielë në Sarandë, në takimin elektoral përmbyllës, ku sulmoi partitë e vogla dhe të reja, duke i quajtur “cikli i dytë i farës së keqe të së ndjerës LSI”.

“Janë ca zogj të vegjël që sillen vërdallë dhe thonë: ‘ne jemi të rinj’. Ata rini kanë vetëm moshën e kryetarëve të tyre. Partitë e vogla janë për interesa të vogla, sa më e vogël partia, aq më të vogla interesat e atyre që shesin veten si përfaqësues të interesave të mëdha. Mos ujisni barin e keq, se rritet. Imagjinoni që pa qenë fare në Parlament, thonë se duan zgjedhje të parakohshme. Për të njëjtat arsye që u krijua e ndjera LSI – për pazare dhe interesa personale”, tha Rama.

Rama kërkoi nga qytetarët të mbështesin Partinë Socialiste në zgjedhjet e 11 majit, duke argumentuar se sipas tij vetëm PS ka qëndruar gjithmonë në mbrojtje të interesit kombëtar.

Duke iu referuar historikut të PS-së, ai shtoi: “Partia Socialiste mund të ketë bërë gabime në 35 vjet, por nuk ka asnjë moment që të ketë tradhtuar interesin kombëtar. Asnjë. Zero.”

Rama theksoi se zgjedhjet e 11 majit janë më shumë sesa një proces elektoral, duke i konsideruar si një “përmbushje të një misioni historik” për integrimin e vendit në Bashkimin Evropian.

LEXONI GJITHASHTU:

• Berisha nga Fieri: PD do t’i rikthejë Shqipërisë të rinjtë dhe të ardhmen e saj
• Rama në Gjirokastër: Shqipëria po bëhet shtet, BE ka standarde e duhet të përmbushim