Rama: Nuk dimë me cilën PD të flasim për presidentin

Kryeministri Edi Rama deklaroi sot në mbledhjen e grupit parlamentar të Partisë Socialiste se në zgjedhjet e 6 marsit qeveria do të ketë përballë një opozitë që garon me veten.

“Nga njëra anë ne, 6 kandidatë të cilët do të ofrojnë një mundësi zgjedhjeje bazuar te puna konkrete. Nga ana tjetër ata me 12, 18 ose më shumë kandidatë. Nga njëra anë ne, nga ana tjetër ata për të provuar forcat mes tyre në kurriz të atyre bashkive dhe hipur mbi shpinën e anëtarësive të këtyre partive”, u shpreh kryeministri.

Ai tha se në zgjedhjet lokale do të përballen me “dy Parti Demokratike, njëra më e madhe se tjetra dhe një tjetër parti më e madhe se dyja bashkë, ngjitur me më të madhen e treve. Tre liderë, njëri grata, tjetri non-grata, i treti dyja bashkë. Edhe grata edhe non grata”.

Rama foli dhe për zgjedhjen e presidentit të ri të vendit. Ai tha se kreu i shtetit të ri do të zgjidhet nga grupi parlamentar socialist dhe se për këtë proces do të ketë këshillim me qytetarët.

“Në muajin prill duhet të zgjedhim presidentin e Republikës, dhe do ta zgjedhë ky grup parlamentar në radhë të parë. Komplikimi i skajshëm i situatës me krijimin e dy Partive Demokratike na e bën të vështirë se ku ta kërkojmë dialogun me opozitën parlamentare”, u shpreh Rama.

LEXONI GJITHASHTU: 

• Zgjedhjet e pjesshme, si mbetën pa kryetarë 6 bashkitë të vendit
• Më 19 shkurt nis fushata për zgjedhjet e pjesshme vendore