Rama: Nuk i kam bërë presion SPAK-ut, kërkoj më shumë nga drejtësia

Kryeministri Edi Rama nuk e konsideron si presion, deklaratën e tij të pak ditëve më parë, ku tha se SPAK-u duhet të marrë nën hetim ish-kryeministrin Sali Berisha dhe presidentin Ilir Meta.

Gjatë një komunikimi për mediat nga selia e PS-së, Rama u shpreh se po kërkon më shumë nga drejtësia e re, pasi është investimi më i madh politik në vend, në bashkëpunim me ndërkombëtarët.

“Të kërkosh më shumë nga drejtësia kur Vetingu po mbush 5 vjet dhe Spaku po mbush 3 vjet, nuk do të thotë të bësh presion. Çfarë do duhej të thoshim pastaj për deklaratat e përfaqësuesve të Bashkimit Europian apo SHBA-ve, ku është kërkuar dhe hapur nominalisht ndëshkimi i politikanëve apo gjyqtarëve të korruptuar. Presion mbi drejtësinë? Sipas meje, jo. Sipas meje, një kërkesë legjitime për të kërkuar më shumë nga drejtësia. Investimi më I madh në historinë e këtij vendi në askpetin politik, qoftë nga PS-ja, qoftë nga miqtë e partnerët ndërkombëtarë”, tha Rama.

Sipas tij, ish-kryeministri Berisha duhet të hetohet pasi është shpallur “non grata” me akuza shumë të rënda.

Rama nënvizoi se kërkon hetim të 21 janarit dhe të tragjedisë së Gërdecit.

“Çfarë presioni është të kërkosh hetimin e një ish-presidenti dhe një ish-kryeministri të shpallur non grata nga SHBA, me akuzat më të rënda të mundshme që lidhen drejpërdrejtë me veprimtarinë e institucioneve të këtij vendi. Nuk kam kërkuar dënim por hetim. Të hetohet 21 janari dhe Gërdeci”, deklaroi Rama.

LEXONI GJITHASHTU

• Rama: SPAK të hetojë politikanët, gjyqtarët dhe prokurorët e korruptuar