Rama poston deklaratën e James Rubin: Fajësimi i UÇK-së do të ishte tragjedi

Kryeministri Edi Rama, ka reaguar pas deklaratës së ish-zëvendëssekretarit amerikan të Shtetit, James Rubin, i cili gjatë një interviste me gazetaren Ilva Tare, në podcastin Balkans Debrief, lidhur me gjyqin e ish-udhëheqësve të UÇK-së në Hagë theksoi se lutet që ata të mos shpallen fajtorë nga Gjykata Speciale në Hagë.

Në një postim në rrjetet sociale, Rama ka ndarë deklaratën e Rubin, duke shkruar: “LIRIA KA EMËR. Shpallja fajtorë e luftëtarëve për liri do të ishte një tragjedi.”

Rubin e cilësoi një vendim të tillë si “tragjedi për njerëzit që luftuan dhe dhanë jetën për lirinë e tyre”, duke shtuar se një shpallje fajtorësh pa prova do të ishte një “plagë e madhe për sistemin ndërkombëtar të drejtësisë”.

Rubin ka dhënë më parë dëshminë e tij para Dhomave të Specializuara në mbrojtje të ish-presidentit Hashim Thaçi dhe krerëve të tjerë të UÇK-së, të akuzuar për krime lufte dhe kundër njerëzimit.

Ai ka theksuar se shpallja fajtorë e udhëheqësve të UÇK-së do të dëmtonte narrativën historike të luftës për liri dhe do të krijonte precedentë të rrezikshëm për gjykatat ndërkombëtare në të ardhmen.

LEXONI GJITHASHTU:

• Rubin përfundon dëshminë në Hagë: Ishte privilegj të flas në mbrojtje të UÇK-së
• Rama poston foton e Thaçit me Wesley Clark: Emri i Hashimit simbol i sakrificës
• Pas përplasjeve për UÇK, Rama dhe Kurti bashkë në Londër për Procesin e Berlinit