Rama uron Fatos Nanon për ditëlindje: Pa ty rruga jonë do ishte më e gjatë

Kryeministri Edi Rama ka zgjedhur rrjetet sociale këtë të martë për të uruar publikisht ish-kryetarin historik të Partisë Socialiste, Fatos Nano, me rastin e ditëlindjes së tij.

Nga Brukseli, ku ndodhet për një leksion në Kolegjin e Europës në Bruzh, Rama ndau një mesazh personal e politik njëkohësisht, duke nënvizuar rolin që Nano ka pasur në rrugëtimin europian të PS-së dhe të Shqipërisë.

“Në këtë ditë të shënuar të lindjes së tij teksa pas hapjes së 4 kapitujve të tjerë të negociatave të anëtarësimit, po udhëtoj për të mbajtur një leksion në Kolegjin legjendar të Europës në Bruzh më erdhi krejt natyrshëm dëshira që t’i uroj publikisht Fatos Nanos, liderit historik të Partisë Socialiste, një ditëlindje të gëzuar dhe jetë të gjatë 100 vjet”, shkruan Rama.

Duke e cilësuar si një figurë kyçe në transformimin e Partisë Socialiste drejt vlerave europiane, Rama vlerësoi kontributin e Nanos veçanërisht në fillimet e viteve ’90.

“Sot kur Shqipëria e sheh nga afër majën ku duhet të ngjitet pas një rrugëtimi të stërgjatë, dua të them se si pjesë e këtij rrugëtimi, Fatosi ka meritën e madhe që e ktheu partinë tonë në një forcë me sy e me zemër nga Europa”, shkruan ai.

Më tej, kreu i qeverisë nënvizon se pa drejtimin e Nanos në fazën e parë të Partisë Socialiste, rruga e Shqipërisë drejt integrimit mund të kishte qenë më e gjatë.

“Sikur ta mendosh për një moment, atë fazë të parë të historisë së Partisë Socialiste, në Shqipërinë e zhytur në vorbullën e rrumpallës demokratikase, pa Fatos Nanon në krye të saj, mendja të thotë se rruga jonë mund të kishte qenë shumë më gjatë”, përfundon Rama.

Postimin e shoqëron edhe me një urim personal:

“Respekt, përqafime dhe gëzuar i dashur Kryetar.”

LEXONI GJITHASHTU:

• Gledis Nano fiton dhe në apel gjyqin me qeverinë shqiptare, përfiton 100 mijë € paga
• “Fatos Nano gaboi, ja dha pushtetin Berishës!”- Rrëfehet fotografi i tij Agim Rama