Rama zbulon prapaskenat, si shkoi Genta Sula kryetare te Autoriteti i Dosjeve

“Emrin e zonjës Sula e kam dëgjuar për herë të parë pikërisht nga ish-kryetari i ish-LSI”.

Kështu deklaroi kryeministri Rama i cili këtë të shtunë u shpreh se Ilir Meta ka qenë i pari që e ka propozuar Genta Sulën për pozicionin që mban sot, ndërsa aktualisht është duke e shantazhuar.

Rama u shpreh me superlativa për Sulën, arritjet e të cilës i konsideron mbreslënëse.

“Unë i besoj trupës së drejtuar nga Genta Sula e vetë asaj. E cila s’ka asnjë lidhje tjetër me politikën, përveç faktit që e ka propozuar në atë detyrë personalisht Ilir Meta apo Metaj. Dhe me sa duket ka qëlluar si rrallëherë dhe ku, pikërisht në atë dreq vendi ku djalli fshihet pas inicialeve, që të dalë i hajrit për ligjin e për shtetin një person i propozuar nga ajo parti, e cila së fundmi ndërroi edhe emrin e vet, mu si dikur Ilir Metaj, kur u kthye në Ilir Meta,” – shkroi kryeministri.

Ndër të tjera ai tregoi dhe prapaskenat se si në atë kohë ai kishte dëgjuar nga Meta për aftësitë e Genta Sulës, sigurisht bashkangjitur me një CV serioze.

“Si bashkëkryetar asokohe i koalicionit PS-LSI, ai më pyet një ditë: “E njeh këtë Genta Sulën?”. “Jo!”. “Aaa, duhet ta njohësh! Genta është grua e rrallë, me integritet, e mençur, e zonja shumë, ta çojmë zv.ministre atje tek Veliaj?”. “Patjetër!”. Dhe më vonë, kur duhej zgjedhur drejtuesi i Autoritetit të sapokrijuar të Dosjeve: “Ore ça opinioni ke krijuar për atë Genta Sulën?”. “Dëgjoj fjalë të mira, nuk e njoh nga afër!”. “Bëhen kto emërimet tek Autoriteti i Dosjeve, ta çojmë Gentën atje se këta të përndjekurit e ke parasysh… Nuk mbushin mirë!”. “Dakord!”. “Le të merret Baba Taku me Gentën e me ato punë e ke parasysh?!..”. Kështu, me propozim të atij vetë dhe falë një CV-je realisht serioze, Genta Sula u bë kryetare e Autoritetit me votën e shumicës parlamentare të kohës,” – shkroi Rama.

Nga ana tjetër, Rama e cilëson Metën një kriminel që është duke u sjellë si viktimë. Sipas tij ajo çfarë kreu i Partisë së Lirisë duhet të bëjë është mbështetja e Autoritetit të Dosjeve për të ndryshuar ligjin dhe zbuluar të vërtetën.

LEXONI GJITHASHTU:

• Meta i kundërpërgjigjet Ramës: Karikatura në revistat e ish-Sigurimit