Raporti i OSBE për zgjedhjet, reagon ambasada amerikane

Ambasada amerikane në Tiranë ka reaguar lidhur me raportin përfundimtar të OSBE-ODIHR lidhur me zgjedhjet vendore të 14 majit.

Në një postim të publikuar në faqen zyrtarë në Facebook thuhet se “ambasada e SHBA mirëpret raportin e fundit të ODIHR-it për zgjedhjet vendore të 14 majit që përshkruan fushat me përmirësim të vazhdueshëm, si dhe mangësitë. Shtetet e Bashkuara nxisin qeverinë, partitë politike dhe institucionet shtetërore të zbatojnë rekomandimet e ODIHR-it, të cilat përfshijnë keqpërdorimin e burimeve shtetërore në nivel qendror dhe vendor, akuzat për blerje votash nga të gjitha palët, marrjen e masave për të siguruar fshehtësinë e votimit dhe parandalimin e frikësimit të votuesve, si dhe presionin mbi punonjësit e sektorit publik dhe votuesit”.

“Raporti theksoi gjithashtu nevojën për të siguruar zbatimin e ligjit për të drejtën e informimit në mënyrën e duhur, dekriminalizimin e shpifjes, si dhe mbështetjen e gazetarisë së pavarur. Shtetet e Bashkuara mbështesin angazhimin për të trajtuar të gjitha rekomandimet e ODIHR-it, në mënyrë që të sigurohet një kuadër zgjedhor gjithëpërfshirës dhe konsekuent si dhe kërkesat e popullit shqiptar për një demokraci të fortë”, thuhet në deklaratën e ambasadës amerikane.

LEXONI GJITHASHTU:

• ODIHR publikon raportin përfundimtar për zgjedhjet e 14 majit
• Berisha: Zgjedhjet në Kukës u blenë në mënyrën më të pamëshirshme