Rastet e shtuara me COVID-19 në RMV, Armend Asllani: Situata është nën kontroll

Ministria e Shëndetësisë në Maqedoninë e Veriut ka njoftuar se gjatë 24 orëve të fundit kanë humbur jetën 5 persona nga coronavirusi dhe janë regjistruar 103 raste të reja nga 841 testime të kryera.

Qytetet me shifra më të larta të të prekurve janë Shkupi me 46 të infektuar dhe Tetova me 17 raste.

Zëvendësministri i Shëndetësisë në Maqedoninë e Veriut, Armend Asllani, tha për Euronews Albania se rastet me COVID-19 janë shtuar pasi qytetarët nuk kanë respektuar masat dhe distancimin social.

“Në aspektin e numrave që kemi rritje alarmante është si rezultat i një numri pasi nuk po respektohen masat. Në përgjithësi do të thoja se persona të infektuar dhe të shtruar në spital janë diku 14 %, ndërsa një pjesë e tyre janë me shenja të lehta”, tha ai.

Ai theksoi se edhe Maqedonia e Veriut ka pasur personel mjekësor të infektuar me COVID-19, por se situata është nën kontroll.

“Po! Kemi pasur një numër më të madh, por do të theksoj se 91 % janë shëruar dhe janë kthyer në punën e tyre. Situata është nën kontroll në këtë aspekt. Sipas ekspertëve pritet që ky numër do të jetë në rënie sepse vala e dytë arriti pikun”, tha ai.