Reforma zgjedhore, Alibeaj: S’është vendi për show politik, PD e vendosur për…

Sekretari i përgjithshëm i PD dhe bashkëkryetari i komisionit të reformës zgjedhore, Enkelejd Alibeaj në një reagim në rrjetet sociale shprehet se Komisioni i Reformës Zgjedhore nuk është vendi ku bëhet show politik.

Teksa iu përgjigj akuzës së Gazment Bardhit, Alibeaj thekson se opozita është e mirëpërfaqësuar dhe PD është e vendosur për të mbrojtur interesat e qytetarëve shqiptarë

“Komisioni i reformës zgjedhore nuk është vendi ku bëhet show politik, qoftë edhe për të shkuar drejt rrugës së shpresës. Opozitarizmi nuk është certifikatë që të mund ta shpërndajë dikush. Rregullat e lojës janë ato të caktuara, që kur u nis procesi i reformës. Aty, çdo parti dhe fluks opozitar është i mirëpërfaqësuar, me kërkesë të vetë PDSH. Secili ka të drejtë dhe detyrim të marrë pjesë, të ulet, të punojmë e të bëjmë propozime opozitare bashkë. Ashtu siç PD ka bërë deri më tani, për të mbrojtur interesat e qytetarëve shqiptarë dhe zgjedhjet e ndershme: me lista të hapura, Shqipëria 1 zonë elektorale, votë për diasporën dhe votim&numërim elektronik. Rregullat nuk ndryshojnë sa herë që ndonjë deputet ndryshon qëndrim. PD është e vendosur për reformë zgjedhore për shqiptarët!” shprehet Alibeaj.