Reformën zgjedhore do e bëni me Bashën? Rama: Ku është ky, ai mund të mos shfaqet

Kryeministri Edi Rama ishte këtë të premte në një konferencë për mediat ku i pyetur nëse do e bëjë reformën zgjedhore me deputetë opozitar përkrahës të Bashës, Rama u përgjigj se nëse thotë se do e bëjë këtë, i bie të japë një premtim që mbase s’do mund ta mbajë dot.

Ai tha se pavarësisht se si kryetar i Partisë Demokratike, njihet Lulzim Basha duke e pasur parasysh atë si personazh politik, Rama tha se mbase ai mund të bjerë dakord e në fund të mos shfaqet. Sipas kryeministrit reforma zgjedhore ka sigurisht rëndësinë e saj, por kjo çështje do zgjidhet me komisionin e reformave zgjedhore.

“Pyetja ime “ku është ky” mbase ishte impuls i brendshëm nga një kujtesë që më sjellë gjithmonë një buzëqeshje kur dëgjoj këtë emër, por lidhet pikërisht me këtë, të thuash a do ta bësh këtë gjë me Lulzim Bashën dhe të kërkosh që tjetri, në rastin tim unë, se Çuçi nuk e njeh aq mirë sa unë. I bie që unë të marr një angazhim që mund të mos e mbaj se tjetri mund të mos shfaqet fare.

Kjo është një shaka që është më shumë se gjysmë e vërteta. Thelbi është se Partia Demokratike, e bekuar si një gjë e jashtëzakonshme kur lindi është katandisur në një gjë që nuk e di. Është histori unikale. Ka emra që po kanë lidhje me Partinë Demokratike, por pastaj nuk dimë më se çlidhje ka Partia Demokratike me shumë të tjerë.

Është çudi kjo që po ndodh, futen në mes flakët dhe tymi, ndërkohë që edhe pa ta është e  vështirë të kuptosh kush është kush. Aty është krijuar një mjegull që ne nuk dimë si të veprojmë.

Reforma zgjedhore ka rëndësinë e vetë. Është një element që buron nga Gjykata Kushtetuese, në këtë rast kemi komision të reformave zgjedhore, ai do e bëjë reformën zgjedhore. Se kush është kush aty, mbase ndonjë ditë do e gjejnë vetë ata”,-tha kryeministri Rama.