Reshjet e dëborës shkaktojnë probleme në Korçë dhe Shkodër

Shqipëria prej natës së të shtunës është përfshirë nga një mot i ftohtë, ku nuk kanë munguar reshjet e shiut dhe të dëborës. Në zonat veriore reshjet e dëborës kanë shkaktuar probleme në akset rrugore, ndërsa shumë familje janë përballur me mungesën e energjisë elektrike për shkak të reshjeve, që janë shoqëruar edhe me stuhi.

Aktualisht në Korçë reshjet e dëborës vijojnë duke e bërë të vështirë qarkullimin e mjeteve në asket rrugore. Korrespondenti i Euronews Albania Xhensil Shkëmbi thekson se trashësia e dëborës në qytet është 5 centimetra, kurse në zonat malore ka arritur mbi 25.

“Kanë vazhduar reshjet e dëborës gjatë gjithë natës në qarkun juglindor të Korçës. Momentalisht reshjet e dëborës janë të intensitetit të ulët, ndërsa në zonat mbi 1000 metra mbi nivelin e detit janë shoqëruar me stuhi ere. Në Dardhë për më tepër se 40 minuta nuk kanë qenë të pastruara rrugët pasi asnjë borëpastruese nuk ishte aty për të bërë të mundur hapjen e tyre. Trashësia e borës në qytet është 5 centimetra, në zonat malore mbi 25 centimetra”, raporton gazetari.

Në qarkun e Shkodrës probleme janë regjistruar në zonat e thella malore. Korrespondenti Teodor Gjerga thekson se për shkak të motit të keq rreth 100 familje në Vermosh kanë mbetur pa energji elektrike, ndërsa rruga që të çon drejt Thethit turistik ëshë e bllokuar.

“Borëpastrueset kanë punuar dhe kanë bërë të mundur hapjen e akseve rrugore, ku më problematike paraqitet situata në akset e thella malore. Problematika ka pasur dhe në Vermosh, ku trashësia e dëborës i ka kaluar 20 centimetra që prej mbrëmjes së djeshme ka pasur mungesë të energjisë elektrike. Janë 100 familje, të cilat nuk kanë energji elektrike që me fillimin e dëborës. Problematika është edhe në rrugën që të çon në Theth, e cila është bllokuar”, thotë gazetari.

Lexoni gjithashtu: 

Moti në Shqipëri, çfarë parashikojnë meteorologët për këtë javë