Rey Manaj, rënia në Tiranë dhe ngritja në Serbi

Ishte mbrëmja e 7 qershorit 2025 kur Kombëtarja shqiptare përballej në sfidën e parë ndaj Serbisë në “Air Albania”, në kuadër të kualifikimeve për Kupën e Botës.

Dhe pikërisht në minutën e 45+1 Rey Manaj humbi një penallti përballë ekipit serb ndërsa neshja përfundoi në barazim 0-0.

Menjëherë pas përfundimit të takimit, sulmuesi i Kombëtares u “kryqëzua” nga tifozëria shqiptare.

Komentet negative vërshuan ndaj tij dhe u shtuan më shumë pas deklaratës që dha pas ndeshjes: “Sigurisht, është e vështirë të shënosh gol, se nuk po luajmë kalçeto, por për Botëror.”

Manaj, Sylvinho dhe Kombëtarja u përballën me një trysni të madhe, dyshime dhe mosbesim, që vetëm afër ndeshjes së kthimit në Serbi filluan të veniten pasi vëmendja u përqendrua te masat e sigurisë, stadiumi ku do të luhej dhe presioni për një fitore historike.

Dhe ndodhi ajo që pak e prisnin – një rastësi e madhe dhe e bukur; sërish minuta 45+1, sërish Rey Manaj – këtë herë duke shënuar golin e vetëm në Leskovac, që i dha Kombëtares fitoren historike ndaj Serbisë.

Në festimin e golit, Manaj bëri shenjën e shqiponjës.

Nga “i kryqëzuari” i tifozëve, ai i çoi në delir dhe u kthye në heroin e shqiptarëve në Serbi ndërsa komentet pozitive dhe dashuria për të vërshuan menjëherë.

Një rastësi e çuditshme – ose ndoshta jo; rënia e Rey Manajt në Tiranë dhe ngritja e tij në Serbi.

LEXONI GJITHASHTU:

• VIDEO/ Muralja e parë për Rey Manajn, Mitrovica i thur lavdi pas golit ndaj Serbisë
• Super atmosferë! “Përulën” Serbinë në shtëpi, Kuqezinjtë prekin Rinasin
• “11 vite pritje për këtë fitore”, emocionet e Elseid Hysajt pas fitores historike
• Përfundon ndeshja Serbi-Shqipëri, Manaj shkruan historinë me 1 gol