Dhjetëra protestues pro-serbë në Malin e Zi u mblodhën para selisë së qeverisë në Podgoricë përpara votimit të rezolutës në OKB. Ata mbanin flamujt e Serbisë, Rusisë dhe Mbretërisë së Malit të Zi dhe bërtisnin “tradhti, Kosovë, Rusi” dhe “Serbi-Republika Srpska”.

Në reagimin e tij jashtë OKB-së, presidenti Aleksandër Vuçiç u shpreh se, “ata donin të vendosnin një vulë në ballin tonë por dështuan” dhe vuri në dukje se 107 shtete nuk e votuan rezolutën.

Ndërkohë, Franca bëri thirrje për pajtim në Bosnje e Hercegovinë dhe gjithë Ballkanin.

“Franca u bën thirrje liderëve politikë të vendeve të rajonit të përmbushin këtë kërkesë. Varet nga ne nëse do të shohim drejt së ardhmes, duke e bërë krijimin e Ditës Ndërkombëtare të Reflektimit dhe Përkujtimit të gjenocidit të Srebrenicës një shans për të punuar drejt pajtimit, në bazë të respektit dhe solidaritetit me viktimat”, tha Nicolas de Riviere, ambasador i Francës në OKB.

Familjarë të viktimave të masakrës së Srebrenicës, që po e ndiqnin sesionin e mbajtur në OKB përmes ekranit, u gëzuan nga miratimi i rezolutës dhe u përqafuan me njëri-tjetrin. Por Mejra Gjogaz, që humbi tre djem, bashkëshortin dhe nipin, pavarësisht se shprehu mirënjohjen e saj për votimin, tha se asgjë nuk do t’ia kthejë mbrapsht të dashurit e saj.

LEXONI GJITHASHTU:

• Miratohet rezoluta për Srebrenicën, Basha: Vota pro i vendos emrin e duhur, gjenocid
• Rezoluta për Srebrenicën, qytetarët në veri të Kosovës: Mbështesim serbët e Vuçiçin