Riaktivizohen vatrat e zjarrit pranë pikës kufitare të Kapshticës

Janë riaktivizuar vatrat e zjarrit në afërsi të pikës së kalimit kufitar të Kapshticës, të cilat ishin izoluar gjatë orëve të para të ditës së sotme.

Kjo situatë është shkaktuar nga temperaturat e larta që kanë përfshirë juglindjen e vendit gjatë 24 orëve të fundit.

Terreni i thyer malor po e bën thuajse të pamundur ndërhyrjen me mjete zjarrfikëse. Për pasojë, punonjësit e shërbimit zjarrfikës, së bashku me forca të shërbimit pyjor dhe policisë kufitare, po ndërhyjnë me mjete rrethanore dhe pompa shpine për të izoluar flakët.

Burime bëjnë me dije se pala shqiptare ka kërkuar ndihmën e palës greke për ndërhyrje nga ajri, por deri tani nuk ka një përgjigje pozitive nga shërbimi civil grek.

Zjarri vijon të jetë aktiv edhe në thellësi të pyllit të fshatit Vërnik. Gjithashtu, gjatë paradites së sotme është riaktivizuar një tjetër vatër zjarri mbi fshatin Dishnicë.