Rikthehen reshjet e dëborës në juglindje të vendit, ulen temperaturat

Në juglindje të vendit janë rikthyer reshjet e dëborës. Nëse disa ditë më parë temperaturat në Korçë shënuan 23 gradë Celsius, këtë të martë ato janë ulur deri në -7 gradë Celsius.

Reshje dëbore ka pasur edhe në Qafë Thanë dhe po ashtu në gjashtë qytete të juglindjes, ndërsa në lartësitë mbi 1000 metra dëbora ka arritur deri në 10 cm.

Sektorët e shërbimeve publike, së bashku me bashkitë përkatëse, raportojnë se nuk ka pasur probleme me bllokimin e akseve rrugore rurale, ndërsa OSSHE po punon në disa fshatra të thella të Mokerit dhe Moglicës për rikthimin e energjisë elektrike.

Ndërsa korrespondentja e Euronews Albania në Elbasan raporton se në Steblevë të Librazhdit trashësia e dëborës ka arritur rreth 10 cm, ndërkohë që reshjet e dëborës kanë rënë në të gjithë zonat malore të këtij qarku.

Rrugët janë të kalueshme dhe nuk ka probleme në qarkullimin e mjeteve në akset nacionale.

LEXONI GJITHASHTU:

• Parashikimi i motit për javën, kur pritet të rriten temperaturat
• Reshjet e borës përfshijnë Qafë-Thanën