Rikthimi i madh i Barçës në “Camp Nou”: Laporta pret leje për debutimin

Pas një mungese të gjatë, pritja për rikthimin e Barcelonës në shtëpinë e saj legjendare, “Spotify Camp Nou”, po shkon drejt fundit. Pas më shumë se dy vitesh punime në stadiumin historik, katalanasit shpresojnë të rikthehen më 10 gusht, gjatë ndeshjes së Trofeut Gamper ndaj Comos.

Megjithatë, edhe pse stadiumi është drejt përfundimit, afatet janë tepër të ngushta. Presidenti i Barcelonës, Joan Laporta, në një intervistë për “Mundo Deportivo”, tha se një pjesë e stadiumit mund të hapet me një kapacitet të kufizuar.

“Po, ideja për Trofeun Gamper është të lejojmë hyrjen e 27.000 deri në 30.000 spektatorëve. E kemi konsideruar si një test të përshtatshëm,” u shpreh Laporta.

“Jemi në datën 23 korrik, puna po ecën me një ritëm shumë të mirë dhe presim miratimin e bashkisë për lejen e banimit të parë.”

Ndërkohë, në kuadër të sezonit të ri të La Ligës, Barça ka planifikuar të luajë tre ndeshjet e para jashtë fushe ndaj Mallorcas, Levantes dhe Rayo Vallecanos për të fituar kohë deri në përfundimin e punimeve. Objektivi është që rikthimi i parë zyrtar në “Spotify Camp Nou” të ndodhë më 14 shtator, në ndeshjen ndaj Valencias.

Por sfidat nuk mbarojnë me kampionatin spanjoll. Për pjesëmarrjen në Ligën e Kampionëve, situata është më delikate. Rregullorja e UEFA-s kërkon që skuadra ta luajë të gjithë fazën e grupeve në të njëjtin stadium. Kjo ka bërë që Laporta t’i kërkojë organizmit evropian që Barça ta zhvillojë ndeshjen e parë jashtë fushe.

“Ajo që i kemi kërkuar UEFA-s është të na lejojë të luajmë ndeshjen e parë të Ligës së Kampionëve jashtë fushe. Shorti do të hidhet më 28 gusht, dhe shpresoj që UEFA do të na mirëkuptojë,” deklaroi Laporta, duke shtuar se marrëdhëniet me institucionin janë përmirësuar ndjeshëm dhe ai ka besim te presidenti Aleksander Ceferin.

Për momentin, UEFA nuk ka dhënë asnjë koment zyrtar për këtë kërkesë. Nëse miratohet, pritet që vendimi të shkaktojë jo pak diskutime në arenën evropiane.

• Laporta reagon pas kritikave për festën e Yamal: Do të doja të isha i ftuar

• Arsenal mbyll marrëveshjen me Gyokeres, futbollisti refuzoi Manchester United