Pesë godina u shemben mëngjesin e sotëm në Zonën e Astirit  në kuadër të ndërtimit të ”Lotit 1′ të projektit të ”Unazës së Re”.

Ky ishte aksioni i parë i Inspektoratit Kombëtar të Mbrojtjes së Territorit për këtë fillim viti 2020. 

Ndryshe nga herët e tjera, ky aksion nuk u shoqërua me përplasje mes banorëve dhe forcave të policisë. Së bashku me 35 objektet e prishura në aksionet e mëparshme, ka shkuar në 41 numri i tyre.

Shembja e banesave solli edhe trafik makinash për disa orë në zonën e Astirit. Ndërkohë nesër një objekt 6-katësh do të rrezohet me shpërthim të kontrolluar.

IKMT-ja shembi ditën e sotme 5 objekte në këtë zonë, ndërsa banorët nuk manifestuan asnjë rezistencë duke e bërë më të lehtë punën e këtij institucioni.

Banorët e zonës së Astirit përgjatë një viti kanë bërë rezistencë të fortë në mbrojtje të banesave, por kundërshtimi i tyre në fund nuk mjaftoi dhe shtëpitë u prishën, duke i hapur rrugë kështu ndërtimit të  projektit të “Unazës së re”.

Ky projekt i ri infrastrukturor pritet t’i japë zgjidhje trafikut të rënduar në këtë nyje rrugore.