RMV, 55 vite burg për përgjimet e paligjshme, dënohen edhe ish-ministrja dhe ish-shefi i shërbimit sekret

Gjykata Penale në Shkup ka vendosur të dënojë me 55 vite burg dhe 10 vite dënime me kusht 11 të akuzuarit për përgjimet e paligjshme, mes të cilëve ish-shefin e shërbimit sekret dhe ish-ministren e Brendshme.

Në vendimin e dhënë të premten, gjykata dënoi me 12 vite burg Sasho Mijalkkovin, i cili pati drejtuar shërbimet e inteligjencës në periudhën 2008-2015, kohë gjatë së cilës u zbulua skandali i përgjimit të paligjshëm të rreth 20 mijë qytetarëve, mes të cilëve edhe grupet e opozitës.

Mijallkov u cilësua si organizator i përgjimeve në skandalin e njohur si “Target-Fortesa”. Ndërkohë ish-ministrja e Brendshme, Gordana Jankullovska u dënua me 4 vite burg, me akuzën e shkatërrimit të pajisjeve me të cilat është bërë përgjimi, kjo në mënyrë që të mbuloheshin gjurmët. 

Dy ish-agjentë të shërbimit sekret, që po-ashtu ishin në listën e të akuzuarve, gjenden në arrati në Greqi sepse shteti grek nuk pranon ekstradimin e tyre, por gjykata i dënoi ata në mungesë.

Goran Grujovski u dënua me 15 vite burg, dhe po aq burg mori edhe bashkëpunëtori i tij me të cilin është arratisur, Nikolla Boshkovski.

Për shtatë të akuzuarit e tjerë që janë të përfshirë si bashkëpunëtorë gjatë përgjimeve, janë dhënë dënime me nga 1 deri në 6 vite burg.

Lexoni gjithashtu:

RMV, arratiset ish-shefi i inteligjencës Sasho Mijallkov, akuzohet si përgjegjës i skandalit të përgjimeve

Dorëzohet Mijallkov: Kisha simptoma të Covid, s’e dija se po më kërkonin