INSTAT publikon shifrat: Rritja e çmimeve goditi familjet, sa u ul konsumi

Rritja e çmimeve goditi buxhetet e familjeve shqiptare në vitin 2022. Të dhënat tregojnë shpenzimet mesatare mujore u rritën në 88 mijë lekë, ndërsa konsumi u ul mbi 2%.

Shpenzimet mesatare mujore për një familje në Shqipëri arritën në 88 mijë lekë në vitin 2022. Kjo shumë është 4.5% më e lartë se në vitin 2021.

Në vlerë shpenzimet ishin më të larta dhe kjo ishte e logjikshme, me inflacionin e lartë që preku vendin në nivelin 6.7%, por në terma realë, familjet shqiptare kanë konsumuar më pak se sa në vitin 2021.  

Kjo do të thotë se konsumi real i familjeve shqiptare gjatë vitit të kaluar u ul me 2.2 për qind.

Të dhënat që nxjerr Instituti i Statistikave tregojnë se rritja e çmimeve goditi rëndë buxhetet familjare, veçanërisht ato me të ardhura të pakta.

Sipas INSTAT, kostot e jetesës ishin më të larta në Tiranë, ku një familjeje iu desh të  shpenzonte mesatarisht 104 000 lekë në muaj, ndërsa shpenzimet më të ulëta u regjistruan në qarqet e Dibrës dhe Kukësit në masën 73 mijë lekë.

E ndarë sipas kategorive, peshën më të madhe të shpenzimeve, edhe vitin e kaluar e kishin ushqimet me 40%, ndjekur nga taksat me 10%, për t’u mbyllur me argëtimin me 2.7%.

LEXONI GJITHASHTU:

• Të blini një pronë apo të prisni për ulje çmimesh? Këshillon agjenti
• Rama: Çmimet e “Internetit Roaming” janë ulur deri në 99%