Rrjedhje nga gazsjellësit rusë, autoritetet gjermane: Akt sabotazhi

Autoritetet në Gjermani dhe Danimarkë kanë nisur hetimet për rrjedhjen masive të gazit nga gazsjellësit “Rrjedha e Veriut” 1 dhe 2.

Njollat e gazit u konstatuan fillimisht ditën e hënë në ujërat daneze dhe suedeze nga gazsjellësi i dytë dhe më vonë nga ai i parë, si pasojë e një humbjeje në pompat e presionit.

Duke cituar burime federale, gazeta gjermane “Tages shpigel” raporton se ka pak gjasa që rrjedhjet të jenë aksidentale dhe po konsiderohen nga autoritetet si akte të pastra sabotazhi.

Aktualisht asnjë nga gazsjellësit nuk çon gaz nga Rusia drejt Gjermanisë. Kjo, pasi funksionimi i “Rrjedha e Veriut 2” u pezullua menjëherë pasi përfunduan punimet; ndërsa sa i takon njishit, ishte Moska zyrtare që ndërpreu furnizimet më herët gjatë muajit. Pavarësisht kësaj, të dyja strukturat janë të mbushura me gaz.

Pas konstatimit të parë ditën e hënë, zyrtarët e marinës daneze shpërndanë një paralajmërim për lundërtarët dhe caktuan një zonë ndalimi prej 5 miljesh detare përreth gazsjellësit, pasi ujërat e ndotura konsideroheshin të rrezikshme për trafikun detar.

Ndërkohë, kompania që menaxhon gazsjellësit ka deklaruar se për momentin është e pamundur të thuhet se kur ata do të jenë sërish operativë.

LEXONI GJITHASHTU:

• Rusia rihap gazsjellësin për në Evropë
• Rusia sulmon me raketë gazsjellësin në Vasylkiv
• Gjermania ndalon certifikimin e gazsjellësit rus