Rrugëtimi drejt paqes, Sllovenia dhe Serbia forcojnë marrëdhëniet pas tensioneve

Ministrja e Punëve të Jashtme e Sllovenisë, Tanja Fajon, e ka pritur në Lubjanë ministrin e Jashtëm serb, Marko Gjuriq. Fajon e konsideroi “dinamik dhe të gjithanshëm” bashkëpunimin mes dy vendeve, ndërsa shkroi për takimin në një postim në Facebook.

Ajo tha se u dakorduan me Gjuriqin për një takim të përbashkët të dy qeverive, ndërsa përmendi edhe rinovimin e dialogut mes Kosovës dhe Serbisë.

“Ne ramë dakord që t’i forcojmë konsultimet politike midis Sllovenisë dhe Serbisë dhe ta mbajmë një takim të përbashkët të dy qeverive.

Unë trajtova gjithashtu domosdoshmërinë e zgjidhjes së çështjes së trashëgimisë pas shpërbërjes së ish-Jugosllavisë, rinovimin e dialogut midis Beogradit dhe Prishtinës dhe vazhdimin e përpjekjeve të Serbisë për ta forcuar sundimin e ligjit, shoqërinë demokratike dhe median e lirë”, shkroi Fajon.

Kryediplomatja sllovene e quajti Serbinë “partner të rëndësishëm ekonomik”. “Tregtia mes vendeve i kalon 2 miliardë euro, rreth 1500 kompani sllovene operojnë në Serbi. Ne duam të tërheqim më shumë investime serbe këtu. Biseduam edhe për organizimin e forumit të investimeve”, shkroi Fajon.

Ajo tha se “Sllovenia është mbështetëse e madhe e zgjerimit të BE-së në Ballkanin Perëndimor dhe në Lindje”.

“Tani është një moment i favorshëm gjeostrategjik për zgjerim. Ne mbështesim përpjekjet e Serbisë për ta vazhduar procesin e negociatave”, tha Fajon.

Me Gjuriqin, ajo tha se u pajtuan edhe për “rëndësinë dhe peshën e departamentit të zgjerimit të BE-së”.

“Dialogu dhe vullneti politik janë çelësi për zgjidhjen e sfidave, edhe aty ku mund të kemi këndvështrime të ndryshme”, shkroi në fund Fajon.

LEXONI GJITHASHTU:

• Nga fëmijëria te emërimi ambasador në Shqipëri, diplomati slloven: Doja gazetarinë!
• Serbia thotë se ushtarët afër kufirit penguan kontrabandën e druve