Rusët dhe ukrainasit dakord me ndërmjetësimin e turqve për eksportin e grurit

Pak pamje, pak detaje, por shumë optimizëm të paktën tek Kombet e Bashkuara pas takimit të mbajtur në Turqi mes rusëve dhe ukrainase, për zhbllokimin e grurit ukrainas të bllokuar në portet e detit të Zi. Pas takimit, sekretari i përgjithshëm i OKB-së nuk e fshehu optimizmin.

 “Sot në Stamboll kemi bërë një hap të rëndësishëm përpara në garantimin e eksportit të drithërave ukrainase përmes detit të Zi. Në një botë të errët si pasojë e krizës globale, të paktën sot pamë një rreze shprese,” – u shpreh Antonio Guterres.

Negociatat, sërish me OKB-në si vëzhgues, do të vijojnë javën e ardhshme.

 “Më shumë punë teknike nevojitet për të materializuar progresin, por vrulli është i qartë. Në fund, qëllimi i të gjitha palëve nuk është një marrëveshje mes Rusisë dhe Ukrainës, por një marrëveshje për gjithë botën,” – shtoi Guterres.

Lufta në Ukrainë ka thelluar krizën ushqimore botërore, menjëherë pas krizës së pandemisë, në një kohë kur Kievi është një nga eksportuesit e parë në botë të drithërave.

Për momentin nuk janë dhënë detaje mbi bisedimet e zhvilluara. Deri tani, Moska ka kërkuar të inspektojë anijet për të verifikuar që nuk transportojnë armë për Ukrainën, ndërsa kjo e fundit ka kërkuar garanci nga sulmet ruse, pas heqjes së minave në portet e saj.

LEXONI GJITHASHTU:

• Kievi optimist për marrëveshjen me Rusinë për rihapjen e Detit të Zi