Rutte: Hungaria, Sllovakia dhe SHBA janë kundër anëtarësimit të Ukrainës në NATO

Sekretari i Përgjithshëm i NATO-s, Mark Rutte, tha se anëtarët e aleancës ushtarake ranë dakord vitin e kaluar në një samit se Ukraina është në një “rrugë të pakthyeshme” për t’u anëtarësuar, por se kërkesa duhet të miratohet unanimisht nga të gjithë aleatët.

“Ndërsa flasim, disa aleatë po thonë se nuk do të japin pëlqimin e tyre dhe për këtë arsye nuk do të japin unanimitet për hyrjen e Ukrainës në NATO, vende si Hungaria, Shtetet e Bashkuara, Sllovakia, dhe ndoshta disa të tjera”, tha Rutte gjatë një konference të përbashkët për shtyp me zëvendëskryeministrin dhe ministrin e Mbrojtjes të Polonisë, Wladysław Kosiniak-Kamysz.

I pyetur në lidhje me garancitë e sigurisë, ai tha se ato aktualisht po hartohen me tre shtresa, forca të forta të armatosura ukrainase, një e ashtuquajtur forcë sigurie nga Koalicioni i të Gatshmëve dhe garanci amerikane.

“Presidenti amerikan tha në gusht se dëshiron që SHBA-të të jenë pjesë e këtyre garancive të sigurisë. Dhe për momentin, po vazhdojnë diskutimet se çfarë do të thotë kjo saktësisht dhe si do të duket kjo paketë kolektive e garancive të sigurisë”, u tha Rutte gazetarëve.

“Është jashtëzakonisht e rëndësishme sepse, në të vërtetë, pas një marrëveshjeje paqeje, nëse jo NATO-ja, dhe NATO për arsye praktike nuk është e mundur tani, si ta parandalojmë një sulm të mëtejshëm të rusëve? Dhe Putini duhet ta dijë se pas një marrëveshjeje paqeje, nëse ai do të përpiqet të sulmojë përsëri Ukrainën, reagimi do të jetë shkatërrues. Dhe kjo është pikërisht mënyra se si po i projektojmë këto garanci sigurie”, tha ai.

LEXONI GJITHASHTU:

• Rutte: Presim nga Serbia që të nxjerrë para drejtësisë autorët e sulmit në Banjskë
• Rutte vlerëson përpjekjet e Trump-it për ti dhënë fund luftës në Ukrainë