Sadushi: Vdekja e gjyqtarit ishte e paralajmëruar, publiku i helmuar nga urrejtja

Gjyqtarët mbajtën 1 minutë heshtje në nderim të gjyqtarit Astrit Kalaja, në hapjen e punimeve të mbledhjes së jashtëzakonshme në Këshillin e Lartë Gjyqësor, këtë të enjte.

Kryetari i Gjykatës së Lartë, Sokol Sadushi, në fjalën e tij tha se vdekja e Astrit Kalasë është një vdekje e paralajmëruar dhe se prej vitesh gjyqtarët janë bërë shënjestër e fyerjeve, kërcënimeve dhe denigrimeve.

“Pikërisht aty ku duhej të mbretëronte ligji, ndodhi e pamendueshmja. Ngjarja tragjike që na ka mbledhur sot është pikërisht pasoja më ekstreme e kësaj atmosfere të helmuar, një ngjarje që duhej parandaluar, sepse ishte paralajmëruar në çdo fyerje, në çdo deklaratë të papërgjegjshme, në çdo sulm publik ndaj një gjyqtari që bën vetëm detyrën e tij.

Në vend që të mbrohej pavarësia e gjyqësorit, është goditur autoriteti i tij. Në vend që të ngrihej besimi te ligji, është lejuar që opinioni publik të helmohet nga gjuha e urrejtjes dhe paditurisë.

Zëra të shumtë nga politika partiake e shtetërore, nga media joprofesioniste dhe nga individë që shfaqen si “juristë të shquar”, pa pasur as kulturën më të thjeshtë juridike, janë bërë komentues të përditshëm të vendimeve gjyqësore, pa përgjegjësi, pa etikë dhe shpesh pa asnjë dije ligjore minimale.

Ata interpretojnë Kushtetutën sipas interesit të momentit dhe shpërndajnë verdikte televizive nëpër studio që imitojnë sallat e gjyqit. Kjo nuk është liri fjale, është deformim publik i drejtësisë.

Dhe kur shteti hesht, kur institucionet që duhet të mbrojnë pavarësinë e gjyqësorit heshtin, kjo heshtje bëhet bashkëfajësi morale”, është shprehur Sadushi.

LEXONI GJTHASHTU:

• Bardhi: Takimi i Arubas zbulon lidhjet e qeverisë me krimin e organizuar