Sekuestrohen 30 kilogramë kanabis në Tepelenë, katër persona në pranga

Katër persona janë arrestuar nga policia në Tepelenë pasi u kapën duke transportuar një sasi lënde narkotike drogë. Sipas policisë, janë sekuestruar tre thasë me kanabis me rreth 30 kilogramë.

Në kuadër të operacionit të koduar “Monitorimi”, në  aksin rrugor “Bënçë-Tepelenë”, u kapën në flagrancë dhe u vunë në pranga shtetasit I. D., 54 vjeç dhe F. D., 19 vjeç (babë e bir), banues në fshatin Bënçë, pasi në automjetin me drejtues shtetasin I. D. dhe pasagjer shtetasin F. D., në urën e Bënçës, Tepelenë, u gjetën 3 thasë me rreth 30 kilogramë cannabis sativa.

Gjithashtu, u kap shtetasi M. M., 27 vjeç, që lëvizte me automjetin tip “BMW”, i cili monitoronte rrugën ku kalonte automjeti me lëndën narkotike, me qëllim shmangien e shërbimeve të Policisë.

Në vijim të operacionit, shërbimet e Forcës së Posaçme Operacionale kanë kapur dhe arrestuar edhe shtetasin R. B., 27 vjeç, pasi qarkullonte pas automjetit me lëndë narkotike, me automjet tjetër ku mbante një armë zjarri kallashnikov dhe municion luftarak, me qëllim shitjen.

LEXONI GJITHASHTU:

• Me kanabis në makinë gati për shitje, arrestohen 4 persona në Shkodër
• Po transportonin 8,2 kg kanabis, arrestohen dy vëllezërit në Kurbin