Serbi| Mbishkrimet “vritini shqiptarët”, Kamberi letër ambasadorëve: Po nxitet dhuna

Shqiptarët që jetojnë në Serbi kërkojnë ndihmën e shteteve perëndimore për të frenuar gjuhën e urrejtjes ndaj tyre.

Deputeti shqiptar në Parlamentin e Serbisë, Shaip Kamberi ka reaguar për grafitet antishqiptare që janë shfaqur së fundmi në Bujanoc.

Përmes një letre të gjatë dërguar në Ambasadën e SHBA-së, Misionin e OSBE-së dhe Ambasadën Britanike në Serbi, Kamberi shkruan se me grafitet antishqiptare po nxitet dhuna ndaj shqiptarëve dhe se një shqetësim madhor mbetet pasivizimi i adresave të shqiptarëve.

“Rritja e ndjenjës antishqiptare dhe diskursi përjashtues i promovuar nga disa zyrtarë qeveritarë kërcënojnë ekuilibrin delikat të multietnicitetit në Luginën e Preshevës. Multietniciteti duhet të përfaqësojë barazi, drejtësi dhe respekt për të gjitha komunitetet, dhe jo margjinalizimin dhe shtypjen e popullsisë shqiptare e privilegje për tjetrën”, tha Shaip Kamberi, deputeti shqiptar në Serbi.

Deputeti shqiptar kërkon që diplomatët të frenojnë këto fenomene të rrezikshme.

“Në dritën e këtyre zhvillimeve, i bëj thirrje komunitetit ndërkombëtar që të ndërmarrë veprime të menjëhershme: Të dënojë gjuhën e urrejtjes dhe ksenofobisë; Dënoni publikisht gjuhën e urrejtjes dhe retorikën ksenofobike që po përhapet në Luginën e Preshevës”, tha më tej Kamberi.

Disa mbishkrime “Vritini shqiptarët” janë parë në pankarta në publik apo të shkruara në oborret e disa institucioneve shtetërore.

LEXONI GJITHASHTU:

• Shaip Kamberi merr mandatin si deputet në Kuvendin e Serbisë
• Shaip Kamberi: Nëse valëvit flamurin shqiptar në Preshevë, përballesh me pasoja