Serbia duhet të vendosë për rrugën e saj europiane, thotë ambasadori amerikan

Ambasadori i SHBA-ve në Beograd, Christopher Hill ka deklaruar se ka ardhur momenti që Serbia të vendosë në lidhje me politikën e saj të jashtme, drejt rrugës së integrimit europian.

Sipas tij, Serbia duhet të vendosë nëse dëshiron të ketë “një ushtri të vetë-mjaftueshme dhe të blejë armë nga vende të ndryshme, apo t’i bashkohet mbrojtjes kolektive”.

Për mediat serbe, Hill është shprehur se ajo çfarë po ndodh në Ukrainë, është situatë krejt ndryshe nga ajo e Kosovës në vitin 1999.

“Për dallim nga e kaluara, kur në Serbi mendohej se ekziston një rrugë e tretë, se vendi nuk ishte as me Lindjen e as me Perëndimin, tani shumica e serbëve mendojnë se ka një rrugë të drejtë dhe duan të zgjedhin rrugën e duhur”, është shprehur Hill, raporton Kosova Press.

Ambasadori beson se të gjithë elementët duhet të jenë në tryezën e bisedimeve.

“Nëse flasim për integrimet euroatlantike, ato janë gjithashtu një element në atë tryezë të bisedimeve. Kur negocion, njëra palë dëshiron një gjë, pala tjetër dëshiron diçka tjetër, por atëherë duhet të flasësh për këtë”, ka përfunduar ai.

LEXONI GJITHASHTU

• Albin Kurti: Serbia, një Bjellorusi e Ballkanit
• Borell shpreson që Kurti dhe Vuçiç të takohen deri në verë