Serbia kërcënon të largohet nga Euro 2024

Serbia ka kërcënuar se do të tërhiqet nga Euro 2024, pasi pretendojnë se mes tifozëve në ndeshjen ndërmjet Kroacisë dhe Shqipërisë të mërkurën, ka pasur thirrje raciste.

Gjatë barazimit 2-2 në ndeshjen e Grupit B, Serbia pretendon se tifozët shqiptarë kanë brohoritur me thirrje raciste ndaj serbëve.

Sekretari i përgjithshëm i Federatës së Futbollit të Serbisë, Jovan Surbatoviç, ka kërkuar që të merret sanksioni më i ashpër.

Ai i tha transmetuesit shtetëror serb RTS: “Ajo që ndodhi është skandaloze dhe ne do t’i kërkojmë organit qeverisës evropian UEFA për sanksione, edhe nëse kjo do të thotë të mos vazhdojë gara.”

Serbia është në Grupin C dhe e filloi turneun me humbjen 1-0 nga Anglia të dielën.

Surbatoviç tha se ishte “i sigurt se do të ndëshkohen” pas vendimit të UEFA-s të mërkurën për të anuluar letrat kredenciale të gazetarit kosovar, Arlind Sadiku.

Sadiku bëri një gjest nacionalist të shqiponjës me dy duar ndaj tifozëve të Serbisë gjatë ndeshjes kundër Anglisë. Gjesti imiton shqiponjën në flamurin kombëtar të Shqipërisë, e cila mund të ndezë tensionet midis nacionalistëve serbë dhe shqiptarëve etnikë, të cilët përbëjnë shumicën dërrmuese të popullsisë së Kosovës.

“Do të kërkojmë nga UEFA që të ndëshkojë federatat e të dyja seleksioneve”, ka shtuar Surbatoviç.

“Ne nuk duam të marrim pjesë në këtë, por nëse UEFA nuk i ndëshkon ata, ne do të mendojmë se si do të vazhdojmë”.