Serbia reagon pas vendimit të Kosovës për reciprocitet të letërnjoftimeve

Drejtori i së ashtuquajturës Zyrë serbe për Kosovën Petar Petkoviç ka thënë se vendimi i Kosovës për vendosjen e masave reciproke për letërnjoftime dhe që pas datës 30 shtator të anulojnë vlefshmërinë e targave “KM”, paraqet “goditje të drejtpërdrejtë për të gjithë serbët”.

“Është e papranueshme që përfaqësuesit e bashkësisë ndërkombëtare të heshtin dhe të pretendojnë se janë të ngathët ndaj këtij kërcënimi konflikti dhe hakmarrjeje, ndërsa Albin Kurti përgatit fillimin e një konflikti të madh dhe sulmin ndaj serbëve në fund të shtatorit”, ka thënë Petkoviç, sipas mediave serbe, shkruan KosovaPress.

Ndërsa presidenti i Serbisë, Aleksandër Vuçiç tha se ka një ndryshim të plotë të situatës në Ballkanin Perëndimor.

“Ne jemi gjithmonë të gatshëm për dialog, ndërsa disa të tjerë nuk kanë qenë kurrë të gatshëm për një bisedë thelbësore dhe kanë mbështetjen e fuqive perëndimore. Ata (Kosova) janë plotësisht të mbështetur nga Britania e Madhe dhe Gjermania”, tha Vuçiç.

“Ata morën dy vendime. Njëri ka të bëjë me ndalimin e hyrjes me letërnjoftime, dhe tjetri është një vendim me qëllimin e vetëm për të dëbuar serbët nga veriu, për të krijuar një stuhi të re”, tha ai.

“Këtu është e qartë se nuk ka dialog dhe bisedime. Do të ketë shumë probleme. Ne gjithmonë do të përpiqemi ta ruajmë paqen, por këtë nuk e duan të tjerët, jo vetëm shqiptarët nga Kosova, por edhe mentorët e tyre”, është shprehur Vuçiç.

LEXONI GJITHASHTU:

• Kosova merr vendim për targat, reciprocitet me Serbinë për letërnjoftime
• Samiti i NATO-s, Rama: Kosova të ftohet në mekanizmin e Partneritetit për Paqe