Sergei Lavrov flet për luftën dhe bashkëpunimin me Trump: NATO ka shkelur premtimet

Ministri i Jashtëm i Rusisë, Sergei Lavrov, në një intervistë për gazetarët amerikanë, deklaroi se administrata e presidentit Donald Trump e bazon politikën e saj të jashtme mbi interesat kombëtare të SHBA-së. Sipas tij, Uashingtoni dhe Moska mund të kenë interesa të ndryshme, por duhet të shmangin përplasjet, veçanërisht ato me natyrë ushtarake.

Lavrov rikujtoi premtimet e liderëve perëndimorë, përfshirë ish-sekretarin amerikan të Shtetit, Jim Baker, dhënë ish-udhëheqësit sovjetik Mikhail Gorbachev, sipas të cilave NATO nuk do të zgjerohej drejt lindjes. Ai e cilësoi këtë si një angazhim politik që u shkel me zgjerimin e NATO-s, duke përfshirë ish-republikat sovjetike Estoninë, Letoninë dhe Lituaninë.

Ministri i Jashtëm rus përmendi përpjekjet e mëhershme për bashkëpunim, përfshirë krijimin e Këshillit NATO-Rusi në vitin 2002, që kishte si objektiv luftën kundër terrorizmit, parandalimin e migracionit të paligjshëm dhe trafikut të drogës. Ai gjithashtu vuri në dukje Deklaratën e Stambollit të vitit 1999, ku u miratua koncepti i “sigurisë së pandashme”, duke theksuar se asnjë shtet nuk duhet të forcojë sigurinë e tij në dëm të një tjetri – një parim që, sipas tij, është shkelur nga NATO.

Lavrov akuzoi Perëndimin për përshkallëzimin e krizës në Ukrainë, duke përmendur ngjarjet e vitit 2014 si një “grusht shteti”, pasojat e të cilit përfshinë aneksimin e Krimesë dhe përkeqësimin e situatës për rusishtfolësit në lindje të Ukrainës. Ai kritikoi gjithashtu dështimin e Marrëveshjeve të Minskut dhe ndryshimin e qëndrimeve të vendeve perëndimore ndaj tyre.

Në lidhje me të ardhmen e NATO-s, Lavrov ngriti pikëpyetje mbi mbijetesën e aleancës pa përfshirjen e SHBA-së, duke theksuar se Uashingtoni nuk do të largohet nga NATO, por do të kërkojë më shumë kontribute financiare nga vendet anëtare. Ai gjithashtu akuzoi aleancën për përshkallëzimin e tensioneve përmes mbështetjes ushtarake ndaj Ukrainës pas vitit 2014.

Sa i përket Bashkimit Evropian, Lavrov kritikoi BE-në për humbjen e pavarësisë ekonomike dhe fokusin e tepruar në përballjen me Rusinë. Ai argumentoi se politikat aktuale po çojnë në deindustrializimin e Evropës dhe sakrifica ekonomike për të mbështetur konfliktin në Ukrainë.

Në fund, Lavrov vlerësoi marrëdhëniet e Rusisë me Kinën dhe vendet e tjera, duke theksuar rëndësinë e dialogut për të shmangur konfrontimet. Ai shtoi se si superfuqi bërthamore, Rusia dhe SHBA-ja mbajnë një përgjegjësi të madhe për ruajtjen e stabilitetit global përmes komunikimit të vazhdueshëm.

LEXONI GJITHASHTU:

• Carney: Përgjigja kanadeze ndaj tarifave amerikane do ketë ndikim maksimal në SHBA
• Rubio me delegacionin ukrainas: Shpresoj se Rusia do t’i thotë po armëpushimit