Seri zjarrvëniesh të qëllimshme në Kumanovë: Digjet makina e prokurorit shqiptar

Në orët e para të mëngjesit të kësaj të hëne, në qytetin e Kumanovës, janë regjistruar disa zjarrvënie të qëllimshme, që përfshijnë një lokal, disa automjete dhe një banesë. Zjarret dyshohet se janë të qëllimshme.

Një nga objektet që u dëmtua ishte zyra për kontabilitet dhe përkthimeve gjyqësore, përballë Gjykatës Themelore në Kumanovë, e cila është në pronësi të Fitor Jakupit, këshilltar në Kuvendin Komunal të Kumanovës.

Ndërkohë që makina e djegur është në pronësi të prokurorit shqiptar, Xhelal Bajrami.

Persona ende të paidentifikuar qëlluan me shishe molotov makinën gjatë orëve të natës duke bërë që të shpërthente në flakë.

Gjithashtu, një tjetër makinë e kolonelit me inicialet E.D. ka pësuar dëme të vogla nga zjarri.

Zjarri përfshiu dhe fasadën e një banese, por që ndërhyrja e zjarrfikësve bëri që flakët të neutralizoheshin.

Dyshohet se kamerat nuk kanë funksionuar gjatë momentit të zjarrvënies, dhe hetuesit nuk përjashtojnë mundësinë që të jenë përdorur bllokues të kamerave ose të internetit për të penguar filmimet.

Grupi hetimor ka konfiskuar disa nga makinat e djegura si prova për hetimet që po zhvillohen. Prokurorët janë në vendngjarje dhe po punojnë për zbardhjen e ngjarjes dhe identifikimin e personave përgjegjës.

LEXONI GJITHASHTU:

• Shkup: Incidenti me flamurin, arrestime dhe akuza për destabilizim
• I veshur me flamurin kuqezi, i mituri ndalohet se dëmtoi tabelën e konullatës serbe