Sërpska diskuton ndalimin e financimit publik për partitë politike

Më 21 maj, në Banja Llukë u mbajt një seancë e jashtëzakonshme e Kuvendit Kombëtar të Republikës Sërpska (RS), ku ndër çështjet kryesore të diskutimit ishte një projektligj që synon ndalimin e financimit të partive politike nga buxheti i këtij entiteti të Bosnje e Hercegovinës dhe nga komunat përkatëse.

Ky propozim vjen pas vendimit të përfaqësuesit të lartë ndërkombëtar në Bosnje, Christian Schmidt, më 24 prill, për të pezulluar pagesat publike për dy parti politike: Aleancën e Socialdemokratëve të Pavarur (SNSD) të Millorad Dodikut dhe Partinë e Bashkuar Serbe, të udhëhequr nga Nenad Stevandiq. Schmidt e justifikoi këtë vendim si një përgjigje ndaj “sulmeve flagrante ndaj rendit kushtetues të Bosnjës dhe parimeve të Marrëveshjes së Dejtonit”.

Në këtë seancë foli edhe presidenti i RS-së, Millorad Dodik, i cili shënoi 30-vjetorin e Marrëveshjes së Paqes së Dejtonit duke kërkuar “një Dejton 2.0”. Ai theksoi se ideja nuk nënkupton ndarje, përshkallëzim apo braktisje të paqes, por një rikthim te korniza fillestare e marrëveshjes, e cila sipas tij është thelbësore për mbijetesën e Republikës Sërpska.

Dodik, i sanksionuar ndërkombëtarisht për veprime që cenojnë rendin kushtetues të Bosnjës, tha se Marrëveshja e Dejtonit ka funksionuar mirë deri në momentin kur filloi të “ndryshohej me forcë”. Ai përsëriti thirrjen për dialog ndërmjet dy entiteteve të vendit – Republikës Sërpska dhe Federatës – për të rishikuar balancat politike në vend.