‘Shantazh diplomatik’, Kreshnik Spahiu: Njoftimi i ministrisë për Kim-in, jo rastësi

Juristi Kreshnik Spahiu e konsideron një shantazh diplomatik, njoftimin e publikuar disa ditë më parë nga Ministria e Jashtme, ku thuhej se kishin nisur procedurat për zëvendësimin e ambasadores amerikane, Yuri Kim.

Në një intervistë për Euronews Albania, Spahiu u shpreh se njoftimi nuk ishte një rastësi.

Sipas tij, kjo u konfirmua nga vetë Yuri Kim, e cila tha se do të qëndrojë më gjatë në vendin tonë.

“Fatkeqësisht, Ministria e Jashtme e Republikës së Shqipërisë, mori kompetencat e Departamentit amerikan të Shtetit, në kapërcim të kompetencave ligjore dhe në thyerje të etikës diplomatike. Ministria e Jashtme e Republikës së Shqipërisë u mor me afatet e mandatit të ambasadores amerikane. Ky ishte një skandal që nuk kishte ndodhur në kohën e Enver Hoxhës. Enver Hoxha u jepte drejtim ose i mbyllte fare marrëdhëniet diplomatike, por nuk thoshte, të merrej me emërimin dhe shkarkimin e ambasadorëve të huaj.

Koha tregoi që Ministria e Jashtme e Republikës së Shqipërisë nuk e bëri rastësisht këtë shantazh diplomatik. Së pari, Ministria e Jashtme e Republikës së Shqipërisë ka 90% të ambasadorëve shqiptarë, që i ka nëpër botë, që i ka në nomeklaturën e saj përtej afateve ligjore dhe proceduriale, të cilët kanë kaluar të gjithë afatin 3-vjeçar. Çuditërisht, Ministria e Jashtme socialiste në Shqipëri, nuk deklaron se kush janë ambasadorët shqiptarë që kanë mbaruar mandatin, por merret me ambasadoren amerikane, mandati i të cilit është kompetencë e DASH-it”, theksoi ai.

LEXONI GJITHASHTU

• Gazetari zbulon përgjigjen e DASH-it: Çfarë më thanë për mandatin e Yuri Kim-it
• ‘Yuri Kim po korr atë që mbolli’, Koka: Vendosi raport preferencial me qeverinë
• Bledian Koka: Ambasadorja Yuri Kim po ndërhyn te emrat e SPAK-ut