SHBA-ja akuzon Rusinë si përgjegjëse për krimet e luftës

Shtetet e Bashkuara të Amerikës dhe aleatët e saj akuzojnë Rusinë si përgjegjëse për krimet e kryera nga forcat e saj prej fillimit të luftës.

Në një takim të Këshillit të Sigurimit të OKB-së të enjten, nënsekretarja e SHBA-së Uzra Zeya tha se për 100 ditë bota ka parë forcat ruse të bombardojnë maternitete, stacione treni, ndërtesa banimi dhe shtëpi, madje dhe vrasjen e civilëve që lëviznin me biçikletë në rrugë.

Ajo tha se SHBA-ja po punon me aleatët e saj për të mbështetur një gamë të gjerë hetimesh ndërkombëtare për mizoritë në Ukrainë.

Prokurori i Përgjithshëm i Irlandës, Paul Gallagher i cili ka mbështetur Ukrainën që në fillimet e para të luftës tha se Irlanda ishte një nga 41 vendet që përcolli më shpejt situatën në Gjykatën Penale Ndërkombëtare.

Ambasadori i Rusisë në OKB Vassily Nebenzia akuzoi vendet perëndimore për “hipokrizi” për kërkimin e papritur të drejtësisë penale ndërkombëtare mbi atë që Moska e quan “operacioni i saj special ushtarak” në Ukrainë.

LEXONI GJITHASHTU:

• Papunësia në Rusi mund të rritet për shkak të sanksioneve, sipas ministrit rus