SHBA dënojnë incidentet në Bosnjë, paralajmërimi për Dodik

Shtetet e Bashkuara kanë dënuar fuqishëm incidentet e fundit të dhunës dhe frikësimit që kanë ndodhur në të gjithë Bosnjën dhe Hercegovinën.

Përmes një postimi në rrjetin social “X”, ambasada e SHBA-ve i bën thirrje të gjithë krerëve të lartë politik që të ruajnë koezionin social dhe të mos promovojnë përplasje etnike.

Gjithashtu ambasada paralajmëroi Dodik se është e papranueshme që banorët boshnjakë të Vlasenicës dhe Potoçarit t’u nënshtrohen kërcënimeve dhe fyerjeve ksenofobike.

“Është e papranueshme që banorët boshnjakë të Vlasenicës dhe Potoçarit u nënshtrohen kërcënimeve dhe fyerjeve ksenofobike dhe se shtëpia e një familjeje serbe është sulmuar në Mostar. Në të njëjtën mënyrë, glorifikimi i kriminelëve serbë të luftës në Vishegrad dhe djegia e flamurit të Republikës Srpska në Zenicë ishin provokime të papërgjegjshme që rritën tensionet dhe shërbyen për të përçarë ato komunitete. Shtetet e Bashkuara dënojnë të gjitha aktet e dhunës dhe intolerancës. Ato gërryejnë kohezionin shoqëror dhe në fund kërcënojnë sigurinë dhe stabilitetin e BiH. Shtetet e Bashkuara përsërisin se është përgjegjësi e autoriteteve të BiH në të gjitha nivelet, veçanërisht e udhëheqësve politikë të vendit, të promovojnë një mjedis të favorshëm për pajtim. Ne mbështesim ata në mbarë vendin që punojnë për të promovuar pajtimin, si dhe për të mbështetur paqen dhe stabilitetin në BiH”, thuhet ne reagimin e ambasadës së SHBA.

Ndërkohë që në një tjetër postim ambasada e SHBA-ve ka ndarë foto të reja të stërvitjes së përbashkët ajrore-tokësore në të cilën morën pjesë Forcat e Armatosura të Bosnjë-Hercegovinës dhe Ushtria Amerikane. Në stërvitjen, e cila u mbajt më 8 janar, morën pjesë edhe dy avionë të fuqishëm amerikanë F-16.

Stërvitja u mbajt në zonën e Tuzlës dhe Bërçkos dhe në fotogaleri mund të shihni se si dukej nga kabina e njërit prej F-16.

Ky trajnim dypalësh, siç ishte paralajmëruar më parë nga Ambasada e SHBA-së në BiH, është një shembull i bashkëpunimit të avancuar që kontribuon për paqen dhe sigurinë në Ballkanin Perëndimor dhe demonstron përkushtimin e Shteteve të Bashkuara të Amerikës për ruajtjen e integritetit territorial të Bosnje-Hercegovinës

SHBA-ja thekson se Kushtetuta e Bosnjë-Hercegovinës nuk e lejon të drejtën e shkëputjes dhe se do të veprojë nëse dikush përpiqet të ndryshojë këtë dispozitë bazë të Marrëveshjes së Dejtonit.

LEXONI GJITHASHTU:

• Pas kërcënimit të SHBA-së, Dodik zbut qëndrimet për ndarje të Bosnjes
• Avionët luftarakë amerikanë i “fluturuan mbi kokë”, reagon Milorad Dodik