Shembja e banesave, avokatja: Bëni sigurim padie që IMT të mos ndërhyjë

Dosjet e pronave të banorëve të Unazës së Re janë ende nëpër gjykata, ku pronarët kërkojnë dëmshpërblimin për to. Avokatja Orgesa Serani tha për emisionin “Mirëmëngjes” në Euronews Albania se një sërë çështjesh gjyqësore janë fituar nga pronarët në shkallë të parë.

Ajo shtoi se këto çështje zgjasin në kohë derisa pronarët të marrin dëmshpërblimin në vlerë monetare aq sa u takon.

“Banorët e Unazës kanë fituar çështje në shkallë të parë. Çështjet ndodhen ne Apelin Administrativ. Të gjithë banorët kanë të drejtë. Banorët kanë ndjekur procedurat ligjore për legalizimin”, u shpreh ajo.

Avokatja deklaroi se banorët që presin shembjen e banesave, të bëjnë sigurim padie, që në këtë mënyrë IMT-ja s’mund të ndërhyjë derisa gjykata të marrë vendim.

Znj. Serani nënvizoi se të gjitha paratë që do jepen për dëmshpërblimet do të paguhen nga buxheti, nga taksat tona dhe kjo do të rëndojë mbi qytetarët shqiptarë.