Shënavlashi i braktisur, rinia ka emigruar, në fshat gjen vetëm të moshuar

Toka të lëna djerrë, shtëpi disakatëshe të braktisura dhe të rinj që numërohen me gishtat e dorës.

Ky është realiteti në ShënaVlash, një nga fshatrat më të bukur të Durrësit.

“Mua për vete djali më ka ik, vajza ka ik, kam dhe 4 kam te shtëpia dhe ato do ikin në derë të huaj. Unë me burrë do ngel, tek ne të gjithë burrë e grua kemi mbetur”, thotë një banore.

Për banorët, ekonomia është shkaktari kryesor i kësaj situate.

“Papunësia. Këtu s’ka paga dhe po pate ndonjë punë, paga është e ulët. E prandaj ikin në Gjermani, Francë e Angli”, shprehet një i moshuar.

“Ka ikje, ka lëvizje. Më tepër ndikon ekonomia. Edhe nga bujqësia s’po punohet, prandaj rruga më e shkurtër, më e mirë për to, është lëvizja”, thotë një banor i zonës.

Vite më parë, shumë nga familjet siguronin jetesën me produktet bujqësore dhe blegtorale, por tani kjo perspektivë duket e zymtë.

Vetëm 7 km larg Durrësit, ky fshat në vetvete ka resurse të shumta, por që mbeten të pashfrytëzuara për shkak të emigracionit masiv të fuqisë punëtore të aftë për punë.

LEXONI GJITHASHTU:

• Shpopullohet fshati Tërbaç në Vlorë: Dikur me 300 familje, sot vetëm 50
• Fshati në Gramsh pa shkollë, 10 nxënësit e vetëm udhëtojnë 2 km për të mësuar