Shiste ora firmato në rrugë, arrestohet 30-vjeçari në Tiranë

Policia e Tiranës ka arrestuar një 30-vjeçar që shiste në rrugë, me çmime fiktive, ora dhe sende të tjera të markave të shtrenjta të cilat dyshohet se kanë hyrë kontrabandë në vendin tonë.

Si rezultat i operacionit të koduar Okazion u kap në flagrancë në rrugën “Reshit Çollaku”, Tiranë, dhe u vu në pranga shtetasi Xh. L., 30 vjeç, banues në Tiranë.

Shërbimet e Policisë i gjetën dhe i sekuestruan në cilësinë e provës materiale, 30-vjeçarit, 25 ora dhe 2 stilolapsa të markave të ndryshme, të shtrenjta. Sendet, të dyshuara të kontrabanduara, shiteshin nga ky shtetas, me çmime fiktive dhe pa fatura.

Në vijim, u referuan materialet në Prokurori dhe për përcaktimin e përgjegjësisë penale të punonjësve të Drejtorisë Vendore të Tatimeve Tiranë, që mbulojnë zonën ku shiste shtetasi Xh. L..

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

LEXONI GJITHASHTU:

• EMRI| Vodhi Range Rover-in pranë një hoteli, arrestohet në flagrancë
• Tentoi të vriste dy efektivët në Vlorë, arrestohet në Belgjikë 38-vjeçari