Shkoi nën efektin e ekstazisë në stërvitje, dënohet me dy vite pezullim futbollisti

Sulmuesi i klubit francez Angers SCO, Ibrahima Niane, është dënuar me dy vite pezullim nga çdo aktivitet futbollistik pasi ka rezultuar pozitiv për substancat narkotike ekstazi dhe MDMA. Lajmi u bë i ditur nga e përditshmja franceze L’Équipe, e cila raportoi se vendimi është marrë më 31 mars nga Agjencia Franceze Antidoping.

26-vjeçari shkoi në gjendje të dehur me substanca narkotike në stërvitje, çka solli që drejtuesit e klubit të kërkonin bërjen e analizave të lojtarit.

26-vjeçari nuk ka mundur të justifikojë praninë e këtyre substancave në trupin e tij përballë autoriteteve antidoping, dhe për pasojë, është pezulluar menjëherë nga çdo aktivitet profesional në futboll. Niane nuk lejohet të luajë, të stërvitet apo të marrë pjesë në trajnime gjatë gjithë periudhës së dënimit.

Ibrahima Niane, i cili më parë ka luajtur edhe për FC Metz, ishte në fund të kontratës së tij me Angers, e cila skadon në qershor të këtij viti. Klubi nuk i kishte ofruar një rinovim të marrëveshjes, dhe ky zhvillim duket se i vë një pikë të parakohshme qëndrimit të tij në skuadër.

Në sezonin e kaluar, ai u aktivizua në 30 ndeshje në Ligue 2, por nuk shënoi asnjë gol. Ndërkohë këtë sezon, ai ka arritur të gjejë rrjetën tre herë në 27 paraqitje, duke ndihmuar Angers të sigurojë qëndrimin në elitën e futbollit francez. Pas këtij pezullimi, e ardhmja e tij në futbollin profesionist mbetet e pasigurt.

LEXONI GJITHASHTU:

• Ekskluzive|Ish-kreu i inteligjencës në Ekuador: Maduro mashtron për mafian shqiptare
• Venezuela akuza Ekuadorit e Kolumbisë: Dërguan mafien shqiptare për të na sabotuar