Shpallet gjendje e krizës në RMV, do të zgjasë 30 ditë

Qeveria e Maqedonisë së Veriut shpalli gjendjen e krizës energjetike për 30 ditët e ardhshme.

Sipas ministrit të ekonomisë Kreshnik Bekteshi masa e vetme që do të merret është shpërndarja e parave nga buxheti i shtetit tek kompanitë shtetërore për shpërndarjen e energjisë elektrike.

Qeveria ka parashikuar t’u ndajë kompanive shpërndarëse rreth 65 mijë euro në total.

“Sollëm gjendje krize që ta përmirësojmë punën e kompanive energjetike. Ta zmadhojmë likuiditetin e tyre, dhe jo për të sjellë masa kufizuese që do të ndikonin negativisht në jetën e përditshme të qytetarëve tanë. Gjithsej kompanive shpërndarëse do tu jepen rreth 4 miliard denarë që të kenë pajisje shtesë për periudhën e dimrit dhe të kemi furnizim të pandërprerë me energji elektrike,” – u shpreh Kreshnik Bekteshi, ministër i ekonomisë në RMV.

Sa i përket prodhimtarisë se Maqedonisë së Veriut me termo dhe hidrocentralet e saj, ministri i ekonomisë thotë se po përmirësohet gjendja dhe se nuk do të ketë problem me furnizimi në asnjë moment.

Ditët e fundit Maqedonia e Veriut është detyruar që të blejë energji elektrike me çmime tejet të larta që kanë arritur mbi 7 milion euro.  

Qeveria ka premtuar se shtrenjtimi i energjisë elektrike nuk do t’i prekë qytetarët të paktën deri në fund të vitit, por edhe nga janari e tutje, nëse do të ketë rritje të çmimit të energjisë, do të jetë në shifra shumë të ulëta.

LEXONI GJITHASHTU: 

• Kriza energjetike në RMV, Ramadani: Zero prodhim nga termocentralet, do ketë rritje çmimi
• Dorëheqja e Zaev, RMV shkon me zv.kryeministrin Dimitrov në ‘Open Balkan’
• Mocion mosbesimi ndaj Zaev, opozita në RMV dorëzon nismën me 61 firma