Shpërthim në Qendrën Klinike Universitare të Kosovës, dëmtohet makina e drejtorit

Një incident i rëndë është shënuar paraditen e kësaj të mërkure në parkingun e administratës së Qendrës Klinike Universitare të Kosovës (QKUK). Bëhet me dije se makina private e ushtruesit të detyrës së drejtorit të këtij institucioni, Osman Hajdari, ka pësuar dëmtime si pasojë e një shpërthimi.

Sipas njoftimit të Shërbimit Spitalor dhe Klinik Universitar të Kosovës (ShSKUK), ngjarja ka ndodhur në rrethana ende të paqarta, në kohën kur po bëheshin përgatitjet për mbledhjen e rregullt të Bordit Drejtues të institucionit.

“Për incidentin janë njoftuar menjëherë organet kompetente, përfshirë Policinë e Kosovës, e cila tashmë ka filluar procedurat hetimore për të sqaruar rrethanat e rastit. ShSKUK shpreh shqetësim dhe keqardhje lidhur me ngjarjen, duke ofruar bashkëpunim të plotë me autoritetet përkatëse,” thuhet në deklaratën zyrtare.

Policia e Kosovës ka konfirmuar incidentin përmes zëdhënëses Flora Ahmeti, e cila theksoi se rreth orës 10:00 është raportuar për një shpërthim në një veturë në hapësirat e QKUK-së.

“Aktualisht nuk raportohet për persona të lënduar, përveç dëmeve materiale. Policia me të gjitha njësitë relevante ka dalë në vendngjarje dhe po trajton rrethanat që karakterizojnë ngjarjen,” deklaroi Ahmeti për KosovaPress.

Hetimet janë në zhvillim e sipër, ndërsa autoritetet nuk kanë dhënë ende detaje mbi natyrën e shpërthimit apo motivet e mundshme që mund të kenë çuar në incident.

LEXONI GJITHASHTU:

• Kuvendi i Kosovës dështon për herë të shtatë konstituimin, refuzohet Haxhiu
• Thellohet kriza politike në Kosovë, LVV dështon për zgjedhjen e kryeparlamentarit