“Shqipëria dhe Turqia i japin botës siguri e paqe”- Spiropali vizitë në Ankara

Kryetarja e Kuvendit të Shqipërisë, Elisa Spiropali, zhvilloi një vizitë zyrtare në Turqi, ku u prit në takim nga kryetari i Asamblesë së Madhe Kombëtare të Turqisë, Numan Kurtulmus.

Ruajtja e paqes në Ballkanin Perëndimor në një kohë konflikti u cilësua nga kryetarët e parlamenteve të Shqipërisë dhe Turqisë si një çështje me rëndësi të madhe. Në deklaratën e përbashkët në Ankara, dy homologët u angazhuan për forcimin e mëtejshëm të marrëdhënieve, veçanërisht në fushën e ekonomisë.

Një Ballkan Perëndimor në paqe dhe pa konflikte. Ky ishte mesazhi i kryetarëve të dy parlamenteve, të Shqipërisë dhe Turqisë, në deklaratën që pasoi takimin kokë më kokë mes Elisabeta Spiropalit dhe Numan Kurtulmuş në Ankara.

“Ne jemi për paqen dhe stabilitetin në Ballkan, sidomos në këtë kohë kur bota po kalon një turbulencë të madhe. Në çdo rajon kemi tension dhe konflikte të armatosura. E nënvizoj si shumë të rëndësishme paqen dhe stabilitetin në Ballkan. Divergjencat që ekzistojnë duhet të zgjidhen përmes dialogut,” deklaroi Numan Kurtulmuş, Kryetari i Kuvendit të Madh Kombëtar të Republikës së Turqisë.

Kryearja e Kuvendit të Shqipërisë, Elisa Spiropali, vlerësoi rolin e Turqisë në mbështetje të paqes, në rajon por dhe në botë.

“Shqipëria dhe Turqia prodhojnë dhe i japin botës siguri e paqe, të cilat janë të nevojshme në çdo kohë, por janë të një rëndësie kritike në kohën që jetojmë, kur retë e luftës nuk janë më në horizont, por rrotull vendeve tona. Ne vlerësojmë Turqinë si një garant historik dhe natyral të paqes në rajon. Shqipëria po merr gjithashtu një rol udhëheqësie në bashkëpunimin mes vendeve të Ballkanit Perëndimor për zhvillimin, integrimin euroatlantik dhe paqen.”

Angazhimi i të dyja vendeve, ku Turqia cilësohet partner strategjik për Shqipërinë, është rritja veçmas e shkëmbimeve tregtare nga 1 në 2 miliardë euro.

LEXONI GJITHASHTU: 

• Apeli i GJKKO lë në fuqi masën ‘Arrest me burg’ për Ilir Metën
• Mbahet seanca në Apel, Alqi Bllako kërkon pafajësinë: S’kam qenë zyrtar i lartë