Shqipëria feston sot 112-vjetorin e shpalljes së Pavarësisë

Sot 112 vjet më parë në Vlorë përfaqësues të vilajeteve shqiptare shpallën Pavarësinë e shtetit shqiptar. Kuvendi Kombëtar i Vlorës, mbajti mbledhjen e tij të parë më 28 nëntor 1912, me aktin e shpalljes së Pavarësisë së Shtetit Shqiptar nga Perandoria Osmane.

Shpallja e Pavarësisë së Shqipërisë ishte kurorëzim i përpjekjeve shekullore dhe luftërave të pareshtura që bënë shqiptarët për çlirimin e vendit.

Qeveria e Vlorës pati një jetë të shkurtër. Ismail Qemali u zgjodh kryetar i Qeverisë dhe ministër i Punëve të Jashtme. Më shumë se një vit nga krijimi,  Qeveria e Vlorës u detyrua të tërhiqet dhe t’ i lëshojë vend një qeverie të drejtuar nga një princ i huaj i emëruar nga “Fuqitë e Kohës”.

Pas shpalljes së Pavarësisë, më 28 nëntor 1912 u formuan edhe organet shtetërore, Pleqësia dhe qeveria e dalë nga Kuvendi i Vlorës. U ngritën forcat e armatosura dhe ato të rendit dhe nisi puna për konsolidimin e arsimit, shëndetësisë, administratës, etj.

Qeveria e Vlorës vuri gurët e parë për krijimin e një sistemi gjyqësor sipas modeleve evropiane. Gjuha shqipe u shpall si gjuhë zyrtare dhe u vendos hapja e shkollave shqipe prej vjeshtës 1914. Akti më i rëndësishëm juridik që nxori qeveria e përkohshme e Vlorës ishte ”Kanuni i përkohshëm i administratës civile të Shqipërisë”, që u botua në nëntor 1913.

Përbërja e qeverisë së Vlorës:

Ismail Qemali, kryetar i Qeverisë dhe ministër i Punëve të Jashtme.

Dom Nikoll Kacërri, Zv.Kryeministër

Mufid Bej Libohova, Ministër për Punët e Brendshme

Abdi bej Toptani, Ministër për Financat

Mehmet Pashë Deralla, Ministër për Luftën (Mbrojtjen)

Petro Poga, Ministër për Drejtësinë

Luigj Gurakuqi, Ministër për Arsimin

Mit’hat bej Frashëri, Ministër për Punët Botore

Pandeli Cale, Ministër për Bujqësinë

Lef Nosi, Ministër i Post-Telegrafit

LEXONI GJITHASHTU:

• Sot përvjetori i ndarjes nga jeta të Ismail Qemalit, Begaj: Babai i Kombit!
• Vlorë, murale me portretet e 40 firmëtarëve të Aktit të Pavarësisë!