Filmi shqiptar fitues i 4 çmimeve prestigjioze ndërkombëtare, “Bolero në vilën e pleqve”, po shfaqet në kinematë e vendit nga 3 shkurti.
Për këtë film, i cili ka korrur jo pak sukses, regjisori Spartak Pecani deklaron se ka bërë bujë jashtë vendit, ndërsa në Shqipëri nuk ka interes të madh për të.
“Kam përshtypjen që nuk duam shumë filmin shqiptar. Këto filma do mbeten, kanë një histori këto. Nuk ka kritikë por nuk ka dhe kinema. Nëpër rrethe nuk ka kinema. Nuk është e trishtueshme që gjithë puna e aktorëve të shuhet? Nuk e duan kinemanë, kam arritur në këtë pikë”, u shpreh regjisori për ‘Mirëmëngjes’ në Euronews Albania.
Filmi flet për dy të moshuar, të luajtur nga Robert Ndrenika dhe Margarita Xhepa-, që i kalojnë vitet e pleqërisë në vetminë e një vile.
Ata shkëmbejnë letra dashurie me njëri-tjetrin, nga kati i dytë në kat të parë, në pamundësinë fizike për t’u takuar.
Ata kanë 3 fëmijë, të cilët nuk jetojnë në vilë. I biri u dërgon një vajzë për t’u kujdesur për ta. Vajza shërbëtore është lezbike dhe ky fakt lind ngjarje që kanë në qendër atë dhe fëmijët e të moshuarve.
LEXONI GJITHASHTU:
