‘Shtëpia e biznesit’ te Piramida e Tiranës, Rama: ‘Derë’ për të adresuar problemet

Shtëpia e Biznesit është struktura më e re në shërrbim të dialogut të institucionalizuar mes qeverisë dhe biznesit.

Deri më tani kjo strukturë ka qenë e vendosur pranë Kryeministrisë, por në vazhdim, ajo do të vendoset në njërin prej kubave të piramidës.

Lajmin e ka bërë të ditur kryeministri Edi Rama gjatë një konference për mediat, sipas të cilit, Shtëpia e Biznesit çeli dyert për të mirëpritur sipërmarrësit në adresimin e problematikave të tyre, por edhe si pikëtakimi e përjavshme e sekretariateve teknike të Këshillit Ekonomik Kombëtar, të cilat do të ngrihen në vijim të punës.

“Këtu do të organizohen takime, do të ketë persona të posaçëm për të qëndruar këtu, për të mbledhur problematikat tuaja dhe për t’i adresuar ato nëpërmjet të gjithë strukturave shtetërore.

Duhet ta shihni këtë shtëpi, si shtëpinë tuaj, ku mendimet të jepen në mënyrë informale, të thjeshtë, jo burokratike dhe të jetë kjo dera juaj për të zgjidhur problematikat që keni me institucionet shtetërore”, tha ministrja e Shtetit për Sipërmarrjen dhe Klimën e Biznesit, Delina Ibrahimaj, në vizitën e zhvilluar në hapësirën e re.

Nga ana tjetër, kryeministri Edi Rama tha se kjo është një derë e drejtëpërdrejtë në tryezën e qeverisë, për të adresuar problemet.

“Të krijuarit e një ure të tillë dhe të hapurit një dere të tillë, që është një derë e drejtpërdrejtë në tryezën e qeverisë, është rruga më e mirë, më e thjeshtë dhe më e shpejtë për të adresuar problemin”, tha Rama.

LEXONI GJITHASHTU:

• Aeroport turistik në Gjirokastër, Rama: Gara hapet brenda 6 mujorit të parë të 2024
• Ndarja nga jeta e biznesmenit Dritan Mezini, Rama: Dje ishim në të njëjtën tryezë